ചങ്ങനാശ്ശേരി: ശബരിമല സ്വർണക്കൊള്ള വിഷയത്തിൽ എൻഎസ്എസ് സ്വീകരിച്ച നിലപാട് തെറ്റായി വ്യാഖ്യാനിക്കപ്പെടുകയാണെന്ന് ജനറൽ സെക്രട്ടറി ജി. സുകുമാരൻ നായർ. ശബരിമലയുമായി ബന്ധപ്പെട്ട വിഷയത്തിൽ മാത്രമാണ് സംഘടന ശരിദൂര സമീപനം സ്വീകരിച്ചതെന്നും 149-ാമത് മന്നം ജയന്തിയാഘോഷങ്ങളുടെ ഭാഗമായി നടന്ന ചടങ്ങിൽ സംസാരിക്കവെ അദ്ദേഹം വ്യക്തമാക്കി. അതിനെ രാഷ്ട്രീയ ചർച്ചകളിലേക്ക് വലിച്ചിഴക്കുന്നത് അനാവശ്യമാണെന്നും അദ്ദേഹം കൂട്ടിച്ചേർത്തു.

ശബരിമലയുമായി ബന്ധപ്പെട്ട വിഷയത്തിൽ മാത്രമാണ് സംഘടന ശരിദൂര സമീപനം സ്വീകരിച്ചത്. മറ്റ് എല്ലാ വിഷയങ്ങളിലും എൻഎസ്എസ് സമദൂര നിലപാടാണ് പിന്തുടരുന്നത്. രാഷ്ട്രീയത്തോട് സംഘടനയ്ക്ക് വിരോധമില്ലെന്നും സുകുമാരൻ നായർ പറഞ്ഞു.

ശബരിമല സ്വർണക്കൊള്ള കേസിൽ കുറ്റവാളികൾ ആരായാലും അവരെ നിയമത്തിന് മുന്നിൽ എത്തിക്കേണ്ടത് സർക്കാർ സംവിധാനങ്ങളുടെയും കോടതിയുടെയും ഉത്തരവാദിത്തമാണെന്ന് അദ്ദേഹം ചൂണ്ടിക്കാട്ടി. നിലവിൽ ആ സംവിധാനങ്ങൾ കാര്യക്ഷമമായി പ്രവർത്തിക്കുന്നുണ്ടെന്നും, വലിയ വീഴ്ചകൾ ഉണ്ടാകുന്ന സാഹചര്യം ഉണ്ടെങ്കിൽ മാത്രമേ പുറം ഇടപെടൽ ആവശ്യമാകൂവെന്നതുമാണ് എൻഎസ്എസിന്റെ നിലപാട്.

രാഷ്ട്രീയ ലക്ഷ്യങ്ങൾ മുൻനിർത്തി സംഘടനയുടെ നിലപാട് തെറ്റായി അവതരിപ്പിച്ച് നടത്തുന്ന പ്രചാരണങ്ങൾ അംഗീകരിക്കാനാകില്ലെന്നും അദ്ദേഹം പറഞ്ഞു. എൻഎസ്എസിന് രാഷ്ട്രീയ ലക്ഷ്യങ്ങളില്ലെന്നും, സമുദായാംഗങ്ങൾക്ക് തങ്ങൾക്ക് അനുയോജ്യമായ രാഷ്ട്രീയ നിലപാടുകൾ സ്വീകരിക്കാൻ പൂർണ സ്വാതന്ത്ര്യമുണ്ടെന്നും സുകുമാരൻ നായർ വ്യക്തമാക്കി.

സംഘടനയ്‌ക്കെതിരെ ഉയരുന്ന ആരോപണങ്ങൾക്ക് പിന്നിൽ സ്വന്തം സമുദായത്തിനുള്ളിലെ ചിലരുടെ നീക്കങ്ങളുണ്ടെന്നും, അവ പരാജയപ്പെട്ടതോടെ വ്യക്തിഹത്യയിലൂടെ നേതൃനിരയെ താറടിക്കാനുള്ള ശ്രമങ്ങളാണ് നടക്കുന്നതെന്നും അദ്ദേഹം ആരോപിച്ചു.